Ranbousman

Montan egzak ranbousman w lan, nimewo Sekirite Sosyal ou oswa ITIN ou, sitiyasyon deklarasyon enpo a, ak ane enpo la, tout bagay sa yo endike sou deklarasyon enpo ou a. 

Si ou pa gen deklarasyon enpo w la, ou ka wè transkripsyon ou nan kont ou a (an anglè). Ou kapab tou resevwa yon transkripsyon pa lapòs (an anglè).

Ranbousman ou an ka retade pou nenpòt nan rezon sa yo:

• Erè komen yo- Sa yo enkli bliye siyen deklarasyon w lan oswa fè yon erè nan matematik.
• Reklamasyon Kredi sou Revni Travay- Dapre lalwa, ranbousman ki gen ladan kredi sa a kenbe jiska mitan mwa fevriye a pou anpeche fwod.
• Reklamasyon Kredi Enpo Siplemantè pou Timoun - Kredi sa a ka konplike epi li mande plis tan pou revize.
• Deklarasyon modifye -Nou konpare epi revize toulede deklarasyon yo.
• Demann soulajman pou konjwen ki blese - Nou dwe trete ka w la manyèlman.

Yo ka diminye ranbousman w lan pou peye enpo ou dwe anvan yo.

Yo ka diminye l tou pou peye yon dèt ki anreta tankou pansyon alimantè pou timoun, yon dèt ki pa enpo ki dwe nan yon ajans federal oswa enpo sou revni leta. Biwo Sèvis Fiskal la (BFS), ki bay ranbousman IRS yo, ap voye yon avi pa lapòs konsènan konpansasyon dèt sa a. Yo pa bay IRS detay sou konpansasyon an.

Plis enfòmasyon sou ranbousman redwi yo (an anglè)

Pafwa nou fè chanjman oswa koreksyon nan deklarasyon enpo ou a, sa ki ka ogmante kantite lajan ranbousman ou an. Lè sa rive, nou pral voye yon avi pa lapòs pou ou ki eksplike ajisteman an.

Si ou kwè ranbousman ou an te ogmante aksidantèlman oswa ou te resevwa yon ranbousman ou pa t gen dwa resevwa, ou dwe retounen ranbousman ki te fèt pa erè a (an anglè) san pèdi tan.

Ou ka mande yon rechèch ranbousman (refund trace) si chèk ranbousman ou te pèdi oswa yo te vòlè li.

Anvan ou kòmanse

Konfime ke tout tan pwosesis la fin pase. Ou ta dwe resevwa chèk ranbousman ou an nan 4 semèn apati dat nou fin voye l la.

Ou ka konfime dat sa a ak estati ranbousman w lan nan sistèm swivi ranbousman an (an anglè) oswa nan kont sou entènèt ou a (an anglè).

Kijan pou mande yon rechèch ranbousman

Sa depann de sitiyasyon dosye w la:

Selibatè, marye ki ranpli separeman oswa chèf fanmi

Kòmanse yon rechèch ranbousman avèk sistèm swivi ranbousman an (an anglè) oswa aplikasyon IRS la. (Ranbousman pou ane aktyèl la sèlman.)

Ou kapab rele liy dirèk otomatik la tou nan 800-829-1954 . Kenbe deklarasyon enpo ou toupre w.

Moun marye ki ranpli ansanm

Kontakte nou nan 800-829-1040 . Kenbe deklarasyon enpo ou a toupre w.

Oswa ranpli epi voye bay nou Fòm 3911 la, Deklarasyon Kontribyab Konsènan Ranbousman (an anglè).

Apre ou fin mande yon rechèch pou ranbousman

N ap trete demann ou an selon sitiyasyon chèk ranbousman an:

Si chèk la pa t ankese

• Si chèk la gen mwens pase yon ane – Nou pral anile l epi voye yon nouvo chèk ranbousman ba ou pa lapòs. Ou ta dwe resevwa nouvo chèk la nan 4 semèn apati dat nou fin bay li a.
• Si chèk la gen plis pase yon ane – Nou pral voye yon nouvo chèk ranbousman ak yon avi CP32 pa lapòs. Ou ta dwe resevwa chèk la nan 4 semèn apati dat nou fin bay li a. Si pou nenpòt rezon nou pa ka bay ranbousman an ankò, n ap voye yon avi CP32A pa lapòs epi n ap mande w pou kontakte nou pou mande yon lòt chèk ranbousman.

Si chèk la te ankese

Biwo Sèvis Fiskal la (an anglè) (BFS) ap voye ba ou pa lapòs yon pakè reklamasyon ansanm ak yon kopi chèk ki te ankese a.

Swiv enstriksyon yo pou ranpli epi retounen pake reklamasyon an.

BFS pral revize reklamasyon w lan ak siyati ki sou chèk anile a pou detèmine si IRS ka ba ou yon nouvo chèk ranbousman. Revizyon sa a ka pran jiska 6 semèn pou li fini.

Erè ka rive. Pou korije nenpòt erè, ranpli yon deklarasyon modifye. Ou ka ranpli elektwonikman ak lojisyèl enpo pou ane aktyèl la ak 2 ane ki sot pase yo.