Pran devan dat limit taks la: Ranpli, peye oswa mande yon pwolongasyon kounye a

Konsèy Fiskal IRS 2025-24, 10 avril 2025

Dat limit taks 15 avril la ap apwoche byen vit – men gen tan toujou pou moun ranpli deklarasyon taks federal elektwonikman epi mande depo dirèk pou nenpòt ranbousman.

Ranpli elektwonikman diminye erè nan deklarasyon taks paske lojisyèl taks la fè kalkil yo, siyale erè komen yo epi fè kontribyab yo konnen enfòmasyon ki manke yo. Pifò kontribyab kalifye pou ranpli elektwonikman gratis epi, lè yo chwazi depo dirèk, anjeneral yo jwenn ranbousman yo nan 21 jou.

Opsyon pou ranpli gratis

Gen plizyè opsyon pou ranpli gratis:

• IRS Direct File (an anglè): Louvri pou kontribyab ki elijib yo nan 25 eta pou ranpli deklarasyon taks ane 2024 yo sou entènèt, gratis, dirèkteman ak IRS.
• IRS Free File: Kontribyab ki kalifye yo – moun ki gen revni brit ajiste $84 000 oswa mwens – ka ranpli sou entènèt lè yo sèvi avèk lojisyèl taks gide gratis. Moun ki pa kalifye yo kapab sèvi ak Fòm Deklarasyon pou Ranpli Gratis yo.
• Asistans Taks sou Revni Volontè (VITA) ak Konsèy sou Taks pou Moun Aje: Pwogram sa yo ofri preparasyon taks gratis pou moun ki elijib nan kominote a pa volontè IRS ki sètifye.
• MilTax (an anglè), yon pwogram Depatman Defans, jeneralman ofri preparasyon taks gratis ak lojisyèl ranpli elektwonik pou tout militè ak kèk veteran.

Tcheke estati ranbousman an

Zouti IRS Kote Ranbousman Mwen an anjeneral montre estati ranbousman an nan lespas 24 èdtan apre yon kontribyab te ranpli deklarasyon taks li. Li pran apeprè kat (4) semèn pou moun ki ranpli fòm papye yo wè estati yo. Zouti a disponib 24/7 epi yo aktyalize li yon fwa pa jou.

Kontribyab ki dwe

Kontribyab yo kapab evite peye enterè ak kèk penalite lè yo ranpli deklarasyon taks yo epi, si yo gen yon balans yo dwe, yo peye montan total yo dwe a nan dat limit taks 15 avril la. Plizyè opsyon peman, ansanm ak opsyon pou moun ki pa kapab peye balans yo an antye disponib nan paj Fè yon peman sou IRS.gov.

Mande yon pwolongasyon pou ranpli

Moun ki bezwen plis tan pou ranpli taks yo ka mande yon pwolongasyon tan pou ranpli anvan dat limit 15 avril la. Sa ba yo jiska 15 oktòb pou yo ranpli san penalite. Kontribyab yo dwe sonje yon pwolongasyon tan pou ranpli se pa yon pwolongasyon tan pou peye.

Pwolongasyon otomatik pou ranpli taks ak règ espesyal pou dat limit taks yo ka aplike pou kontribyab k ap sèvi nan yon zòn konba oswa zòn ki kalifye pou sèvis danjere (an anglè), k ap viv deyò Etazini (an anglè) oswa k ap viv nan sèten zòn dezas. Kontribyab sa yo ka pa bezwen soumèt yon demann pwolongasyon pou ranpli taks yo - men yo ta dwe tcheke pou wè si yo kalifye anvan dat limit taks la.

Jwenn èd sou IRS.gov

Kontribyab yo kapab vizite IRS.gov 24 sou 24 pou jwenn repons a kesyon sou taks (an anglè), plis konsèy ak resous sou taks lè yo vizite paj Kite nou ede w la.

Abòne nan Konsèy Enpo IRS (an anglè)