Fòm 1099-K FAQ: Enfòmasyon jeneral

R1. Fòm 1099-K a (an anglè) se yon deklarasyon enfòmasyon ki sèvi pou rapòte peman ou te resevwa pandan ane a nan sous sa yo:

• Kat kredi, kat debi oswa kat ki gen valè estoke tankou kat kado yo (kat peman yo)
• Aplikasyon peman yo oswa mache sou entènèt pou machandiz oswa sèvis yo (TPSO)

Ou ta dwe resevwa yon Fòm 1099-K si ou te vann yon machandiz oswa ou te bay yon sèvis, si yo te peye w atravè yon aplikasyon peman oswa yon mache sou entènèt, epi peman brit ak tranzaksyon w yo depase limit rapò a, oswa si ou te aksepte yon peman ki te soti nan yon kat peman pou nenpòt montan. Ou ka gen yon obligasyon enpo si ou te fè yon pwofi sou vant machandiz oswa si ou te resevwa peman pou sèvis ou te bay yo.

Fòm 1099-K a se yon deklarasyon enfòmasyon ke aplikasyon peman yo ak mache sou entènèt yo bay lè w sèvi ak yo pou vann machandiz oswa bay yon sèvis. Ou ka sèvi ak enfòmasyon ki sou Fòm 1099-K a ansanm ak lòt dosye enpo w yo pou detèmine enpo kòrèk ou dwe a. Gade Konprann Fòm 1099-K ou a pou plis enfòmasyon.

Lalwa egzije rapò enfòmasyon twazyèm pati pou sèten peman epi li montre li ogmante konfòmite enpo volontè, amelyore koleksyon enpo ak evalyasyon nan IRS, epi konsa l diminye diferans fiskal la (an anglè).

R2. Pa gen okenn montan minimòm yon moun dwe satisfè pou resevwa yon Fòm 1099-K akòz peman yo resevwa atravè yon tranzaksyon kat peman. Kidonk, si ou te resevwa $0.01 peman nan yon tranzaksyon kat peman, ou ta dwe resevwa yon Fòm 1099-K pou peman sa yo.

Gen yon limit pou peman yo resevwa atravè yon TPSO. TPSO yo oblije rapòte lè peman brit total pou machandiz oswa sèvis yo depase $20 000 epi gen plis pase 200 tranzaksyon pou yon benefisyè. Eta ou a ka gen yon limit rapò ki pi ba pou TPSO yo, sa ki ka lakòz ou resevwa yon Fòm 1099-K, menm si peman brit total yo ak tranzaksyon yo pa t depase limit rapò federal la.

R3. Tèm "kat peman" an gen ladan l kat kredi, kat debi, ak kat ki gen valè estoke (tankou kat kado), ansanm ak peman atravè nenpòt mak diferan nan yon kat peman (tankou yon nimewo kat kredi).

Yo bay yon kat peman dapre yon akò ki gen tout sa ki annapre yo: youn oswa plizyè konpayi ki bay kat yo; yon rezo moun ki pa gen rapò youn ak lòt, ak antite ki bay li a, ki dakò aksepte kat yo kòm peman; ak estanda ak mekanis pou jere tranzaksyon yo ant antite komèsan yo ak antite ki dakò aksepte kat yo kòm peman.

R4. Yon TPSO se òganizasyon santral ki gen obligasyon kontra pou fè peman bay benefisyè k ap patisipe yo (anjeneral, yon komèsan oswa biznis) nan tranzaksyon rezo tyès pati yo. Yon egzanp ta ka gen ladan l aplikasyon yo itilize pou jere transfè lajan ant achtè ak vandè.

R5. Pa nesesèman. Limit rapò federal la ki plis pase $20 000 nan peman ak plis pase 200 tranzaksyon se yon egzijans rapò pou TPSO yo, men yon TPSO ka toujou voye yon Fòm 1099-K pou peman pou machandiz oswa sèvis pou montan ki pi piti pase limit yo. Anplis de sa, ou ka resevwa yon Fòm 1099-K ki soti nan lòt antite règleman peman yo, tankou antite akizisyon machann, paske yo pa gen yon limit minimòm pou rapòte. Anplis de sa, si yon TPSO te fè  yon prelèvman sipò dapre seksyon IRC 3406(a), Obligasyon pou dedwi ak prelèvman (an anglè), pou yon benefisyè pandan ane anvan an, yo dwe depoze yon Fòm 945, Deklarasyon Anyèl sou Enpo Federal sou Revni ki te Retni (an anglè), ak yon Fòm 1099-K ak IRS epi bay benefisyè a yon kopi. Epitou, eta ou a ka gen yon limit rapò ki pi ba pou TPSO yo, sa ki ka lakòz ou resevwa yon Fòm 1099-K, menm si total peman brit ak tranzaksyon yo pa t depase limit rapò federal la.

R6. Enstitisyon ki soumèt enstriksyon pou transfere lajan nan kont benefisyè k ap patisipe a responsab pou rapòte tranzaksyon kat peman yo. Nan ka sa a, fasilitatè peman elektwonik la responsab pou rapòte paske li se antite ki soumèt enstriksyon yo pou transfere lajan nan regleman tranzaksyon kat peman yo.

A7. Wi, limit rapò Fòm 1099-K a pa afekte si peman yo enpozab oswa si yo dwe ranpli yon deklarasyon enpo.

Tout revni, kèlkeswa kantite lajan an, dwe peye enpo sof si lwa enpo a di non– menm si w pa jwenn yon Fòm 1099-K. Revni gen ladan l tou kantite lajan yo pa rapòte sou fòm, tankou peman ou resevwa an kach, pwopriyete oswa sèvis.

R8. Montan peman brit la (Kare 1a) nan Fòm 1099-K rapòte kantite total, oswa kantite lajan brit, tranzaksyon peman ki dwe rapòte. Li pa enkli ajisteman pou frè, kredi, ranbousman, transpò, ekivalan lajan kach oswa rabè. Atik sa yo pa revni. Kontribyab yo ka dedwi atik sa yo nan kantite lajan brit la lè yo enkli revni a nan deklarasyon enpo yo.

Montan peman brit la pa gen ladan l pri acha orijinal la, oswa baz, nan nenpòt atik ki vann ak si atik yo te vann nan yon pwofi oswa pèt. Pou plis enfòmasyon sou fason pou etabli baz sa a, ale sou IRS.gov: Piblikasyon 551, Baz Byen yo (an anglè) PDF.

Kontribyab yo pral bezwen sèvi ak Fòm 1099-K yo ak lòt dosye enpo pou ede yo kalkile epi rapòte revni kòrèk yo sou deklarasyon enpo yo a.

R9. Non. Ou pa ta dwe resevwa yon Fòm 1099-K (an anglè) pou acha ou fè. Yo itilize Fòm 1099-K pou rapòte sèten peman ou te resevwa pou machandiz ou vann oswa sèvis ou bay.